09.05.2025
85
Дзень Перамогі і 80-ю гадавіну Перамогі савецкага народа ў Вялікай Айчыннай вайне святкуе Віцебск
У гэтыя хвіліны пачуццё свята і яднання адчувалася асабліва моцна. "Шэсце пакаленняў" стартавала ад плошчы Леніна і прайшло па цэнтральных вуліцах да плошчы Перамогі, дзе ўпершыню за шмат гадоў адбыўся ваенны парад з удзелам вайскоўцаў і ваеннай тэхнікі, уключаючы рарытэтныя машыны.
Да шматтысячнай аўдыторыі звярнуўся старшыня Віцебскага аблвыканкама Аляксандр Міхайлавіч Субоцін:
- Дзень Вялікай Перамогі стаў для нас сімвалам яднання народаў супраць фашызму, генацыду і прыгнёту. Вось ужо 80 гадоў гэтая гістарычная дата з'яўляецца для нас адной з самых шанаваных, светлых і значных. Вялікая Перамога святая. Праўда пра Вялікую Айчынную вайну - наш шчыт. Трымаць яго ў сваіх руках - вялікі гонар і адказнасць. І нам трэба пра гэта памятаць.
Тысячы чалавек далучыліся да агульнанацыянальнай хвіліны маўчання на плошчы Перамогі, а пасля ўсклалі кветкі да падножжа помніка ў знак падзякі і вечнай памяці.
Няхай у сэрцах заўсёды жыве светлая памяць аб подзвігу нашага народа! З Днём Вялікай Перамогі!
